Attach & Detach

Bu darsda attach hamda detach modelar haqida gaplashamiz.

E'tibor bergan bo'lsangiz agar containerni

docker run -p 3000:3000 --rm 0dbc94488402

ko'rinishida ishga tushirsak, terminal band bo'lib qoladi. Ya'ni terminal yakunlanmay kutib turadi.

Ammo mavjud containerni qaytadan ishga tushirsak,

docker start 236ec7e4f8bd

terminalni band qilmaydi. Lekin ikkala holatda ham container ishga tushadi. Bunga sabab, ular turli xil modelarda ishga tushadi.

docker run ... buyrug'i bilan container ishga tushganda standart holatda attach modeda bo'ladi. Qachonki container attach modeda ishga tushsa, terminal band qilinadi va konsolda chiqadigan xabarlarni kutadi. Misol uchun proyektimiz asosida qurilgan image yordamida yangi containerni ishga tushiramiz:

docker run -p 3000:3000 --rm 0dbc94488402

Ana endi http://127.0.0.1:8000 manziliga kirib, inputga istalgan matnni kiritamiz va tugmani bosamiz. Terminalga qaytib, konsolga qarasak biz yozgan matn ko'rinadi.

WARNING

server.js faylida konsolga xabar chiqish kodi yozilgani uchun ham xabar ko'rinyapti.

Ko'rib turganingizdek, container attach modeda ishga tushganda bizda konsoldagi xabarlarni kuzatish imkoniyati bo'ladi.

Agarda biz containerni docker start ... buyrug'i bilan ishga tushirsak, detach modeda ishga tushadi, terminaldagi jarayon yakunlanadi va container orqa fonda ishga tushadi.

Shunga qaramay biz containerni docker start ... buyrug'i bilan attach modeda ham ishga tushirishimiz mumkin. Buning uchun biz -a dan foydalanamiz:

docker start -a 236ec7e4f8bd

Xuddi shunday containerni docker run ... buyrug'i bilan detach modeda ishga tushira olamiz. Buning uchun endi bizga -d kerak bo'ladi:

docker run -p 3000:3000 --rm -d 0dbc94488402

Agar sizga konsoldagi xabarlarni kuzatish kerak bo'lsa, containerni attach modeda ishga tushiring, aks holda detach modeda ishga tushirish maqsadga muvofiq. Har ikkala holatda ham container bir xil ishlaydi.

Yana bir narsani qo'shimcha qilish kerak. Agar sizda container detach modeda ishlayotgan bo'lsa va siz konsoldagi xabarlarni ko'rmoqchi bo'lsangiz, buning 2 xil yo'li bor:

1. Ishlab turgan containerni uni o'chirmasdan attach modega o'tkazish:

docker attach <container_id_yoki_nomi>

2. Yig'ilgan xabarlarni konsolga chiqarish:

docker logs <container_id_yoki_nomi>

1-holatda container attach modega o'tadi va xabarlarni kuzatib turish mumkin. 2-holatda esa yig'ilgan xabarlarni konsolga chiqaradi va jarayon yakunlanadi, ya'ni keyingi keladigan xabarlarni kutib turmaydi.

Lekin agar siz docker logs ... buyrug'i orqali xabarlarni doimiy kuzatib turmoqchi bo'lsangiz, ya'ni keyingi keladigan xabarlarni kuzatib turmoqchi bo'lsangiz, -fdan foydalanishingiz mumkin:

docker logs -f <container_id_yoki_nomi>